பத்தனம்திட்டா: சபரிமலை கோயில் நடை இன்று திறக்கப்படுகிறது. இந்நிலையில், “பக்தர்கள் ஆரோக்கியமான யாத்திரையை உறுதிசெய்ய நடவடிக்கை எடுக்க வேண்டும் என மாவட்ட ஆட்சியர் உத்தரவிட்டுள்ளார்.
சபரிமலையில் பக்தர்கள் 5 நாள்கள் சுவாமி தரிசனத்துக்கு அனுமதிக்கப்படுகின்றனர். கோவிட் நடைமுறைகள் கட்டாயம் பின்பற்ற வேண்டும் என மாநில அரசு அறிவுறுத்தியுள்ளது.
அந்த வகையில், பக்தர்களுக்கு சில வழிமுறைகள் வகுக்கப்பட்டுள்ளன. அவை,
- கோவிட் நெறிமுறையைப் பின்பற்றி நாளொன்றுக்கு 5 ஆயிரம் பக்தர்கள் வரை மட்டுமே அனுமதிக்கப்படுவார்கள்.
- யாத்ரீகர்கள் இரண்டு தவணை கோவிட் தடுப்பூசி போட்டுக்கொண்ட சான்றிதழ் அல்லது 48 மணி நேரத்திற்குள் எடுக்கப்பட்ட ஆர்.டி-பி.சி.ஆர். சோதனை சான்றிதழை எடுத்து வர வேண்டும்.
- கோவிட் அறிகுறிகள் உள்ளவர்கள் யாத்திரையைத் தவிர்க்க வேண்டும்.
- முகக்கவசம் அணிந்து தகுந்த இடைவெளியைக் கடைப்பிடிக்க வேண்டும்.
- கூட்டம் அதிகமாக இருக்கும் உணவகங்கள், கடைகள், வரிசைக்கு வராமல் சிறப்பு கவனம் செலுத்த வேண்டும்.
- கைகளை அடிக்கடி கிருமிநாசினி அல்லது சோப்பு கொண்டு சுத்தம்செய்ய வேண்டும்.
- கரோனா அறிகுறிகள் தென்பட்டால் நிலக்கல், பம்பா, சன்னிதானத்தில் உள்ள அரசு மருத்துவமனைகளில் சிகிச்சை பெறவும்.
- நிலக்கல், பம்பா, சன்னிதானம் மருத்துவமனைகளில் தலா இரண்டு மருத்துவர்கள், செவிலியர், உதவியாளர்கள், மருந்தாளுநர், ஆய்வகத் தொழில்நுட்ப வல்லுநர்கள் பணியில் இருப்பார்கள்.
- பம்பாவில் வென்டிலேட்டர் வசதி உள்ளது. அவசரநிலைகளைச் சமாளிக்க பம்பா, சன்னிதானத்தில் ஆக்ஸிஜன் சப்ளை செய்யப்படுகின்றன.
- யாத்ரீகர்களுக்கு பம்பாவிலிருந்து பாட்டில் குடிநீர் வழங்கப்படும். இரண்டு இடங்களில் தண்ணீர் நிரப்ப வசதிகள் செய்யப்படும். 40 இடங்களில் கை கழுவ சானிடைசர் வசதி செய்யப்பட்டுள்ளது.
ஆடிப் பிறப்பை முன்னிட்டு சபரிமலையில் இன்று நடை திறக்கப்படும். நாளை (ஜூலை 17) முதல் 5 நாள்களுக்கு, அதாவது 21ஆம் தேதிவரை கோயிலுக்குள் பக்தர்கள் அனுமதிக்கப்படுவார்கள். கோயிலுக்குள் சென்று சுவாமி ஐயப்பனை தரிசிக்க முன்கூட்டியே ஆன்லைனில் பதிவு செய்திருக்க வேண்டும்.
இதையும் படிங்க : நேரலை: சபரிமலை ஐயப்பன் கோயில் மகரஜோதி தரிசனம்
